हिमालयाची सावली
आपण आतल्या खोलीत असतो आणि बाहेर TV वर एखादी मालिका किंवा सिनेमा चालू असतो. त्यातील काही संवाद आपल्याला आत ऐकू येतात. आपण आतूनच "अगं, विक्रम गोखले ना? बघ बरोबर ओळखलं की नाही!"
अभिनया बरोबर आपल्या आवाजाचीही कडक ओळख असणाऱ्या मोजक्या अभिनेत्यां पैकी एक आवाज आज कायमचा हरपला.
पणजी दुर्गाबाई कामत, आजी कमलाबाई आणि वडील चंद्रकांत गोखले अशी अभिनयाची हिमाच्छादीत शिखरे. ह्या सर्वांना सलाम करणारं ह्याच कुळातले अभिनय क्षेत्रातील हिमशिखर
म्हणजे विक्रम गोखले.
बॅरिस्टर नाटकामधील गाउन घातलेला, तोंडात सिगारेटचा पाइप आणि हातात पुस्तक घेऊन करारी खरज्यात संवाद म्हणत त्याचा तो विशिष्ठ पौज घेणारा वकील
म्हणजे विक्रम गोखले.
अमिताभ बच्चन समोर अग्निपथ मधील कमिशनर गायतोंडे आणि खुदागवाहमध्ये जेलर रणवीरसिंगच्या भूमिकेत तेवढ्याच ताकदीने अभिनय साकारणारा अधिकारी..
सलमान आणि ऐश्वर्याच्या प्रेमात विघ्न आणणारा हम दिल दे चुके सनम मधील अस्खलित शास्त्रीय गायक पंडित दरबार
म्हणजे विक्रम गोखले.
लग्न संस्थेची मर्यादा ओलांडून ही आपला वाटणारा, कळत नकळत मधील मनोहर देसाई
निवडणुकीच्या राजकारणात उभी-आडवी, तिरपी कशीही चाल करु शकणारा वजीर -पुरषोत्तम कांबळे
म्हणजे विक्रम गोखले.
या सुखांनो या मधील डावीकडे वळून एका नजरेच्या कटाक्षाने आश्वासक संवाद साधणारे दादा अधिकारी
गाजलेल्या अग्निहोत्र मालिकेतील साकारलेला गुढ गंभीर मोरया
म्हणजे विक्रम गोखले.
साधारण १०० हून अधिक हिंदी-मराठी सिनेमात आपल्या अभिनयाने आंतरराष्ट्रीय पातळीवर आपला ठसा उमटविणारा हाडाचा सच्चा रंगकर्मी
म्हणजे विक्रम गोखले.
नाटक, सिनेमा आणि दूरदर्शन मालिका ह्या तिन्ही अभिनय क्षेत्रातील महानायक.
म्हणजे विक्रम गोखले.
सामाजिक कार्य आणि वडिलोपार्जित लाभलेली प्रखर देशभक्ती तेवढ्याच ताकदीने पुढे नेणारा सावरकरभक्त
म्हणजे विक्रम गोखले.
हिमालयाची सावली ही हिमालयाहून ही मोठी होऊ शकते हे दाखवून देणारा सुपुत्र
म्हणजे विक्रम गोखले.
बोलके डोळे, गोल चेहरा, गोरी कांती, सरळ नाक आणि करारीपणा उमटणारा चेहरा कायम लक्षात राहील.
विक्रम गोखलेजी तुम्हाला भावपूर्ण श्रद्धांजली
© मिलिंद सहस्रबुद्धे
२७/११/२०२२
सदाशिव पेठ पुणे ३०
Comments
Post a Comment